"નવું સરનામું"

"પકડો કલમ અને કોઇ પળે એમ પણ બને
હાથ આખે આખો બળે એમ પણ બને..."

ગુજરાતી સાહિત્ય ના શ્રેષ્ઠ કવિઓમાં ના એક મનોજ ખંડેરીયા એ જયારે આ શ્રેષ્ઠ રચના કરી હશે ત્યારે કદાચ કલમ અને પેપર નો દબદબો હશે.પણ અત્યારે કદાચ એમણે લખી હોત તો એવું લખવું પડયું હોત કે

"પકડો કિબોર્ડ ને કોઇ પળે એમ પણ બને....
મોનીટર આખેઆખું  બળે એમ પણ બને.."

વિચારો લખીને અભિવ્યકત કરવાની શૈલી એક જ હોય છે એ પછી કિબોર્ડથી થાય કે કલમથી..બંને માં હવે મોબીલિટી છે, તમે કોઇ પહાડ પર જઇને એકાંતમાં લખી શકો તો ત્યાં લેપટોપ પણ લઇ જઇ ને ટાઇપ પણ કરી શકો..પણ જયાં લોકો સુધી ઝડપથી પંહોચવાની વાત આવે છે ત્યાં ચોકકસ ટેકનોલોજી આગળ છે..પાદરામાં બેઠેલા મનહર ભાઇનો વિચાર એકાદ મિનિટમાં પેરીસમાં બેઠેલા મેથ્યુ સુધી પંહોચે છે ફકત એક કિલક ના સહારે..

અમિતાભથી અન્નાહજારેની લોકપ્રિયતામાં ઘણે અંશે સોશ્યલ નેટવર્કિંગનો ફાળો રહયો છે..કોઇના બ્લોગ ન્યુઝ બનતા હોય છે તો કોઇના આંદોલનની જવાળા...છેલ્લા એકાદ વર્ષથી હું મારા વિચાર ફેસબુક ના સ્ટેસસ પર વ્યકત કરતો રહયો છું ખાસ કરીને ગુજરાતીમાં..બિમાર પડેલી ગુજરાતી ભાષાને સાજી કરવાના એક પ્રયત્ન સાથે શરૂ કરેલા એ સ્ટેટસ ને તમે લોકો આવકાર આપ્યો એ બદલ હું નહી ગુજરાતી તમારો આભાર માને છે..ભાડાના મકાન માં થી પોતાના ઘરમાં આવ્યાની લાગણી સાથે..આજથી હું મારો બ્લોગ શરૂ કરવા જઇ રહયો છું. કહેવાય છે શુભકાર્યમાં ગણપતિની હાજરી જરુરી છે..આજે મંગળવાર છે અને મારુ કાર્ય કેટલું શુભ હશે એ કદાચ ગણપતિ જ નકકી કરશે..

-પલક જાની